Atalmysh fılmdi kórermender elimizdiń barlyq kınoteatrlarynan 21 qarashadan bastap orys jáne qazaq tilderinde kórý alady. Ol tarıhı  oqıǵalarǵa negizdelgen.

Munda QR áskerı qyzmetshileriniń tájik-aýǵan shekarasynda bitimgerlik maqsatta qyzmet atqarý barysynda, 1995 jyly kóktemde bastarynan ótkergen oqıǵa baıandalady. 7 sáýir kúni  Pshıharv shatqalynda Qazaqstan İshki áskeriniń jetinshi qurama rotasy sodyrlardyń tutqıyldan jasaǵan shabýylynyń ot pen oqtyń qursaýyna túsip qalady.

Bul urysta 17 áskerı qyzmetshi oqqa ushyp, 33 adam jaraqat alǵan edi. Aýǵan jaǵynan shabýyl jasaǵan Tájikstandaǵy zańsyz opozısıanyń sodyrlary bir saǵattyń ishinde Tájikstan aýmaǵyna ótip ketýdi josparlaǵan bolatyn. Biraq olarǵa qarsy shabýyldyń óte kúshti bolǵandyǵynan, bes saǵattyq qarýly qaqtyǵystan keıin keri sheginýge májbúr bolǵan.

Bul oqıǵa Qazaqstan Respýblıkasy İshki áskerleriniń tarıhyndaǵy eń qaıǵyly oqıǵa bolyp qalady. Qaza bolǵandardyń beseýi ekinshi dárejeli "Aıbyn" ordenimen marapattaldy. Qaza tapqan sarbazdardyń kópshiligi Shymkent qalasynyń 6506 áskerı bóliminde bolǵan.

Fılmniń prodúseri - Danıar Ibragımov, al ıdeıa avtory - QR Ulttyq ulanynyń Bas qolbasshysy general-leıtenant Rýslan Jaqsylyqov.

Fılmniń túsirilimi Almaty oblysy, İle ózeniniń jaǵasynda ótti.

Aldaǵy ýaqytta fılm 10 serıadan turatyn serıal túrinde túsiriledi. Fılmniń televızıalyq nusqasy "Qazaqstan" telearnasynda kelesi jyldyń 7 sáýirinen bastap, qarýly qaqtyǵystyń  25 jyldyǵyna oraı kórsetiledi.